Il gram ricuart des scorsadis dai Turcs intal XV secul, dai disterminis e des desolazions di lôr puartadis ai puars vilaçs de Patrie, al incità dutis lis tieris a difindisi dreçant sù muris, cjastiei e cjamps trincerâts. Lis devastazions e lis ruvinis avignudis intal 1499 a vevin talmentri preocupât i citadins di Dartigne di domandâ a Vignesie il permès di fortificâ San Martin. Glemone e ritignive malvignût rinfuarçà lis muris di Dartigne che no varès podût oponi une lungje resistence, sedi pe posizion sedi pal numar limitât dai difensôrs; e considerave plui util poni une uniche difese ae largje cente des muris. Al fo chest un ulteriôr motîf di criche jenfri i doi abitâts. Lis beghis a continuarin: plui Glemone a mostrave l'agravi dal so domini, plui Dartigne e cirive di iludi ogni vigjilance, atuant usancis completementri diferentis. A intervignirin svariadis voltis i Lutignints e ancje i Dôs ma spes al fo inutil. Ator al 1562 a vignirin eliminâts i principâi motîfs des disconcuardiis: cun lis gnovis disposizions, Glemone e mantignì su Dartigne un domini che al po jessi definît nominâl, consistent plui in manifestazions di forme che in relazion ai fats. Par chel che al rivuarde i secui XVII e XVIII lis informazions che si riferissin ae Gastaldie di Dartigne a son une vore scjarsis e di nissune impuartance. Il fûc dal Archivi di Dartigne sucedût tor al 1780 al brusà lis notis plui impuartantis par ricostruî cronologjichementri il svilup dal paîs. Al va ricuardât purpûr che i ordenaments politics de Serenissime a vevin semplificât e rindude uniforme la vite des tieris dipendentis, massime chês rustichis e che nuie al podeve disviâ de orbite comune. Si rivà cussì ai famôs ribaltons de Rivoluzion francese.